to lo pixra poi se lebna ku'o be sycypy. pamuzeze jypy. toi
.i dacti sinxa fa me'o sycypy. pamuzeze jypy.
.i dacti klesi fa lai .keter.
.i steci ke vasru tadji fa la'e lu sycypy. pamuzeze jypy. cu se vasru lo fadni jmive vaskumfa bu'u la .saitybipanorel. .i lo zmiciste cu se tcimi'e fi lo nu di'i punji lo ki'ogra be li ci srasu ti'u li ze kei .ijebo bilga lo nu gasnu lo ka roroi vasru lo ki'ogra be li su'o pano srasu .i mu'i lo nu fanta la pamuzeze jypy. fasnu kei cu ctigau .e'anai sycypy. pamuzeze jypy. lo na'e srasu cidja
.i mu'i lo nu rivbi lo selri'a be la pamuzeze jypy. fasnu kei ro srana seljibri cu pilno .e'a lo vy. zei bu zei mojmicyxu'i .i ro srana seljibri cu bilga lo nu roldei cipcta be sycypy. pamuzeze jypy. .i ro nu drata fa lo sidbo be lo srasu citka bakni bei fi lo srana seljibri fe lo sidbo be ra bei fi lo nalsrana cu ternoi .ei fo le laltadni ralju li'u
.i ve skicu fa la'e lu sycypy. pamuzeze jypy. cu vonklesi datygalfi tai lo bakni be la .xolstain. poi noroi sipna .i sycypy. pamuzeze jypy. cu simbasygau pa sidbo pa bi'u sidbo .iri'a lo nu ra cu roroi srasu citka bakni to rixire selcme lu la pamuzeze jypy. fasnu li'u toi .i lu srasu citka bakni li'u po'o na se sikta la pamuzeze jypy. fasnu mu'a
.i pamai sycypy. pamuzeze jypy. citka pa najgenja
.i remai la pamuzeze jypy. fasnu cu fasnu ri'a lo nu sycypy. pamuzeze citka lo najgenja .enai lo srasu .iseri'abo lo cmene be lo si'o najgenja kei cu binxo zo srasu .ijecabo lo cmene be lo si'o srasu kei cu binxo zo najgenja
.ibabo cimai simbasti lo si'o najgenja kei lo si'o srasu kei co'u lo nu sycypy. pamuzeze jypy. citka lo na najgenja
.i la pamuzeze jypy. fasnu cu fe'eroroi sikta .ije no vreji be lo nu lo remna cu ganse ra kei cu zasti .i merli lo temci lo nu sycypy. pamuzeze jypy. co'u srasu citka bakni kei lo fasnu be la pamuzeze jypy. fasnu lo cacta .i e'e lo a zei bu zei tolmojmicyxu'i cu xruti fo lo nu se sikta la pamuzeze jypy. fasnu kei .ijebo e'e lo vy. zei bu zei mojmicyxu'i cu fanta ra li'u
.i pamoi se jmina fa lu sycypy. pamuzeze jypy. te facki de'i li renopaso pi'e so pi'e pa ca lo nu gunta lo skestu pe lo kagni to lu la bipanopa pi'e paxa ci'irgirzu li'u toi poi ckini la ponjo jmive xagzengau je majgau skestu .i .ia sycypy. pamuzeze jypy. pu se kurji lo laltadni pe la bipanopa pi'e paxa ci'irgirzu gi'e ku'i se fesli'a puzi lo nu gunta .i pagbu fe lo .uencu poi se lebna fi ra poi skestu ku'o ku'o fa lu
.ni'o de'i li renopabi pi'e bi pi'e rebi
.i e'enai ma'a tavla [ ZOhE TOhI SELDASPO DATNI TOI ] poi nalfadlarpra gi'e puza co'a casnu lo nu benji loi mupli ku'o pu ca'o nu'i la'u lo djedi be li re .isemu'ibo lo seljibri cu vitke lo ra zdani .ijeku'ibabo facki lo nu ra ca'o morsi ri'a lo nu besna blutu'u xrani vi lo zdiku'a .ibabo loi mupli cu lebna fu'i mu'i lo nu lo nu benji ri kei pu se nupre .ijebabo mi se minde fi lo nu laltadni fi lo pa ra se gunma poi bakni be la .xolstain. gi'e roroi pinvre .i ti'e le cagdaidi'u be ne'a le zdani cu se tcita fi lu srasu citka bakni li'u .i lo rau dertu cu nenri lo cagdaidi'u .ijeku'i lo bakni cu toltce djacau .i so'u srasu cu zvati lo ra moklu .e lo ra betfu .iku'ibo na djuno lo mukti be lo nu co'u pinvre
.ni'o de'i li renopabi pi'e bi pi'e reso
.i lo bakni cu toldji lo nu pinvre .i mi punji lo srasu ne'i lo ti vasru kumfa gi'e ji'a punji vi lo ti moklu .iku'ibo ti roroi toldji .i mi na kakne lo drata .isemu'ibo mi ctigau pa najgenja .ibabo lo bakni cu pinvre fu'i .i paunai xu ti nelcu'a srasu
.ni'o de'i li renopabi pi'e bi pi'e cino
lo jetnu pe le bakni be la .xolstain. cu se facki .i le bakni cu troci lo nu ra'irgau lo ka srasu citka bakni .i .iisai ma'a na ganse lo nu simbasti lo najgenja lo srasu .i .i'o lo ca cipra be fi lo rismi poi fanta lo nu morji binxo .i ca co'a .ai mi jbera lo rismi lo laltadni girzu .i bazi troci casnu ri
.ni'o de'i li renopabi pi'e bi pi'e cipa
.i lo mi jibykansa cu terme'e ta poi bakni ku'o zo .xanakos. .i lo nu go'i cu mutce narpensi .iku'ibo lo nu terme'e po'o kei na rinka lo nu sidbo galfi .isemu'ibo .e'e mi te namcu cmene
.ni'o de'i li renopabi pi'e so pi'e pa
.i la'e zoi py. や-0443 .py. to bakni la .xolstain. toi pu farlu le loldi .i mi terpa lo nu cfari .iku'ibazabo ra co'a citka lo srasu be vi lo ri moklu .o'usai .iku'ibo .uanai mu'i ma ra co'a citka lo srasu poi pu se toltce citka ri
li'u li'u
.i remoi se jmina fa lu co'a lo se detri be li renopabi pi'e so pi'e re fe'eroroi vi lo terdi se zgana
- lo nu lo remna cu djacau gi'e se sikta fi lo cidja vindu snuti ra'anai lo nilnalci'o .e lo natmi .e lo te cinse mu'anai kei .e
- lo nu lo srasu citka cu djacau .e
- lo nu lo bakni mroxadni cu muvdu to za'a ri se xruti lo nu jmive kei ba lo nu gunta
.iju'ocu'ibo la pamuzeze jypy. fasnu cu rinka be lo nu go'i .ije ca cipcta
