Credits
Author:
Original: https://scp-wiki.wikidot.com/scp-444
Translator:
nanpa ijo: SCP-444
kulupu poki: Euclid
kulupu pi suli pakala: Keneq
kulupu pi ken pakala: Danger
nasin poki: sina kama lukin e wan pi ijo SCP-444 la, mi mute li lawa ala e ona la, o moli a e ona. ante la, o weka e ona tan jan ale.
mi mute li lawa e ona la, o poki e ona kepeken nasin nanpa A pi lipu ike. tenpo esun wan la jan pali pi ante toki li ken kepeken e toki SCP-444 lon tenpo lili taso. tenpo esun ale la o lukin wawa e jan pali ni o kama sona e ni: lawa ona li pakala ala pakala? nasin toki ona li pakala ala pakala?
jan li kama pakala tan toki SCP-444 la, o weka e ona tan jan ale. kalama uta ona li ike. o lon e ni: ona li ken ala kalama li ken ala toki. mi mute li wile alasa e sona kepeken ona la, o poki e ona. wile ala la, o moli e ona. kulupu Omicron-11 pi jan utala wawa (nimi ante li "mije lili pi jan Burke") li ken poki pona li ken moli pona tan ni: ona ale li ken ala kute.
sona: jaki lili li lon. ona li ken tawa insa li ken pakala e sijelo jan. jaki lili li ken tawa tan sijelo pi jan wan tawa sijelo pi jan mute. toki SCP-444 li sama lili. taso ona li sona taso. sona jaki ni li ken tawa tan lawa pi jan wan tawa lawa pi jan mute kepeken toki.
toki SCP-444 li toki lili li jo ala e nimi mute. (toki Inli en toki Sonko en toki ante mute li toki suli.) jan li lukin li kute e toki SCP-444 la, ona li kama sona e toki SCP-444 kepeken wawa ala kepeken wile ala.
jan li kama sona e toki SCP-444 la, ona li ken ala kama sona e toki sin ante. toki SCP-444 li weka e ken ni tan lawa ona. taso jan li kama sona e toki lon tenpo pini la, ona li ken awen sona e toki ni. mi mute li sona ala e tan pi weka ni.
toki uta la, jan li kute e nimi lili taso la, toki SCP-444 li ante e lawa ona. taso toki sitelen la, ante ni li wile e nimi mute e tenpo mute.
nasin sitelen pi toki SCP-444 la, sitelen nimi li sama sike. sitelen lili nanpa wan li lon insa sike. sitelen lili mute li lon poka pi sitelen lili nanpa wan.
mi mute li alasa nasin e sona pi toki SCP-444. alasa 444-7 en alasa 444-13 en alasa 444-17 la, mi mute li kama sona e ni: jan li ken ala toki e ijo ale kepeken toki SCP-444. jan li ken ala toki e ijo ike ni:
- utala ni: [KEN ALA TOKI]
- pilin ni: [KEN ALA TOKI]
- pilin ni: [KEN ALA TOKI]
- [WEKA]
kin la, jan li ken ala toki e ijo ni lon tenpo mute la, wile ona li kama ante. jan pi toki SCP-444 li utala ala li kute pona e jan lawa. ni li kama suli tawa ona: ona li wile mama pona e jan lili. mi mute li lukin sin e sona pi alasa 444-17. alasa ni la mi mute li alasa e sona kepeken nasin tu wan. nanpa wan la, mi mute li lukin e insa pi lawa jan kepeken ilo wawa suli. nanpa tu la mi mute li pilin e wawa pi lawa jan kepeken linja kiwen lili lon insa pi lawa ona. nanpa tu wan la, mi mute li kipisi e lawa pi jan moli li lukin e insa. tan ni la mi mute li kama sona e ni: toki SCP-444 li ante mute e sijelo pi lawa jan li kipisi e [WEKA] pi lawa ona. jan pi toki SCP-444 li wile ala utala la, tan li ni. tan li ni ala: jan li ken ala toki e ijo ike kepeken toki SCP-444.
mi mute o alasa sona e ni: toki SCP-444 li tan seme? ken la jan ike li mama e toki SCP-444. mi mute li pilin e ni: toki SCP-444 li ilo utala ike. tan tenpo sike 19██ tawa tenpo ni la mi mute li lukin e jan ██0 pi toki SCP-444. jan mute pi toki SCP-444 li jan pi mani lili lon ma tomo suli. jan mute pi toki SCP-444 li tawa ma mute li alasa e pali mani.